EXPRESIÓN E MOVEMENTO
Debruzada na fiestra inspirei profundamente.
O mundo semellaba detido.
A brisa achegoume unha folla que
danzaba en verde e ocre edificio abaixo.
Pensei que era fermosa.
Os seus bambeos parecían agarimos
na desoladora paisaxe.
Un remuiño multicolor esperaba por ela
na quietude da rúa para comezar a función.
Entón sentín, e nunca antes se me revelara,
que a vida é movemento.
Este é un bo momento para crear, podes achegar o movemento ao lugar que queiras.... á danza, á expresión, ao xogo, deporte, destreza, axilidade, saúde, natureza... Escolle unha música e fai unha coreografía. Deseña un circuito de axilidade con materiais alternativos. Abráianos coa túa destreza enlazando, por exemplo, lanzamentos, rodamentos e botes cun balón. Indaga sobre o teu deporte favorito, outros antigos... Expresa diferentes estados de ánimo, un poema, as catro estacións, ou o que desexes. Inventa un xogo.
A túa imaxinación está tamén en movemento!!